ஓம் நமசிவாய போற்றி!!!

திருச்சிற்றம்பலம்.

தென்னாடுடைய சிவனே போற்றி!!!
எந்நாட்டவர்க்கும் இறைவா போற்றி!!!

சிவனவன் மகிமையை
செவி வழி துளி கேட்டு - திரு
வடி தனை தொழுது
கவி புனைந்தேன் போற்றிட - இவ்
வடியேனைப் பொறுத்தருள்க!

- * -

நமசிவாய நாதனே போற்றி
நலமதை யருளும் தேவனே போற்றி
எமைப் படைத்தாளும் ஏகனே¹ போற்றி
எழிலுரு மாயத் தேகனே போற்றி                                                                         (4)

ஆனந்த நடமிடும் அழகே போற்றி
ஆணவம் அழித்திடும் அனலே போற்றி
வானவர்² வணங்கிடும் வள்ளலே போற்றி
வானெங்கு மின்னொளி வெள்ளமே போற்றி                                                      (8)

கடம்ப வனம்வந்த கடவுளே போற்றி
இடப்பக்க மிடம்தந்த இறைவனே போற்றி
விடமதை உட்கொண்ட விமலனே போற்றி
தடந்தோ³ ளுடைபெருந் தலைவனே போற்றி                                                   (12)

கயிலை மலையருட் கடலே போற்றி
கவலைகள் பொசுக்கும் கனலே போற்றி
மயிலேறு முருகனின் மாணவா போற்றி
மமதைக் கொன்றிடும் மன்னவா போற்றி                                                       (16)

அருள்தரும் ஆனந்த சோதியே போற்றி
அணுநுனி பிறழா நீதியே போற்றி
அந்தமில்லா தொரு ஆதியே போற்றி
அண்ட சக்தியின் பாதியே போற்றி                                                                   (20)

விருப்பு வெறுப்பில்லா விந்தையே போற்றி
பிறப்பு இறப்பில்லா எந்தையே போற்றி
பிறப்பினி தடுத்திடும் பரமனே போற்றி
நெருப்பு மலைநின்ற நிமலனே⁴ போற்றி                                                         (24)

திருமறை யருளிய பரம்பொருள் போற்றி
திருமுறை எழுதிய பெருமிறை போற்றி
கருவறை தனில்அரு வுருவமே போற்றி
கருவரைக் காக்கின்ற திருவருள் போற்றி                                                          (28)

அம்பலத் தாடிடும் ஆண்டவா போற்றி
ஐம்புல மடக்கிடும் ஐயனே போற்றி
மும்மல⁵ மழித்திடும் மூலவா போற்றி
எம்பல முணர்த்திடும் ஏகம்பனே⁶ போற்றி                                                       (32)

அந்தமில்லா ஆதி முதல்வனே போற்றி
சுந்தர சோதி சொரூபனே போற்றி
எந்தையே ஈடில்லா இறைவனே போற்றி
சிந்தை நிறைசிவ பிரானே போற்றி                                                                   (36)

தெய்வப் பரம்பொருள் தேவா போற்றி
சைவத் திருமுறைத் தலைவா போற்றி
வைகை நகருறை இறைவா போற்றி
கைலை மலையிறை பெருமான் போற்றி                                                          (40)

முக்கண் ணுடைய மூலவா போற்றி
சொக்க னெனும் சொக்கநாதனே போற்றி
தெக்கண மெழுந்தருள் தேவனே போற்றி
எக்கணம் மறவா ஏகனே போற்றி                                                                        (44)

இதய மலர்வாழ் அரனே⁷ போற்றி
இமய மலையீஸ் வரனே போற்றி
பயமதை யழித்திடும் பரனே⁸ போற்றி
அபய மளித்திடும் அரணே போற்றி                                                                    (48)

அன்பே உருவான அண்ணலே போற்றி
இன்னல் களையும் கன்னலே போற்றி
மண்ணிலம் காக்கும் மன்னனே போற்றி
விண்ணிறை நீல வண்ணனே போற்றி                                                               (52)

ஐந்தொழில்⁹ புரிகின்ற அரசனே போற்றி
ஐங்கரன் வலம்வந்த அறவனே¹⁰ போற்றி
அறுமுகம் வணங்கிய அழகனே போற்றி
அறியாமை யகற்றிடும் அறிவனே¹¹ போற்றி                                                    (56)

ஏற்றம் தரும் எண்குணத்தானே¹² போற்றி
மாற்றம் தரும் நல்மனத்தானே போற்றி
கூற்றனைத்¹³ தடுக்கும் அம்பலத்தானே போற்றி
தோற்ற மில்லா நுண்புலத்தானே¹⁴ போற்றி                                                        (60)

சுயம்பாய்த் தோன்றிய சங்கரனே போற்றி
மயங்கிட வைக்கின்ற சுந்தரனே போற்றி
பயமதைப் போக்கிடும் பிஞ்ஞகனே¹⁵ போற்றி
இயம்பிட பலம்தரும் மந்திரனே போற்றி                                                           (64)

பிறைமதி சூடிய நிறைமதியே போற்றி
சடையதில் நதிவுடை உமாபதியே போற்றி
அரைகுழுவைத்¹⁶ தோலணிந்த பசுபதியே போற்றி
தடைவெல்ல விடைசொல்லும் அதிபதியே போற்றி                                         (68)

மாயை யகற்றிடும் மாயவனே போற்றி
நோயைத் தீர்த்திடும் தூயவனே போற்றி
தீயாய்ச் சுடர்விடும் நாயகனே போற்றி
தாயெனக் காக்குந்தாயு மானவனே போற்றி                                                    (72)

முப்புரம்¹⁷ எரித்த அப்புலிங்கமே போற்றி
எப்புறமும் இருக்கின்ற எம்பிரானே போற்றி
ஒப்புரவு¹⁸ ஒப்புவிக்கும் ஒப்பில்லானே போற்றி
இப்பிறவி தந்தயெம் அற்புதனே போற்றி                                                           (76)

பக்தருக்கு அருள்புரியும் பரமனே போற்றி
பசிபோக்க கொடைதந்த அமுதனே போற்றி - மெய்
ஞானமதைக் கற்பிக்கும் அறவனே போற்றி - அகங்
காரமதை யழிக்கும்நெற்றித் திலகனே போற்றி                                               (80)

ஐந்தெழுத்து மந்திர முடையானே போற்றி - முழுதும்
அறிந்திட முடியாத மறையோனே¹⁹ போற்றி
பைந்தமிழில் பாடவைத்த பரம்பொருளே போற்றி
குருந்தைமர அடியமர்ந்த குருபிரானே போற்றி                                               (84)

எஞ்ஞானமும் நீயன்றோ எம்பிரானே போற்றி
அஞ்ஞானந்தனை யகற்று மெய்ஞானமே போற்றி
கெஞ்சாது காக்கின்ற நஞ்சுண்டானே போற்றி
துஞ்சாது²⁰ துணைநிற்கும் செஞ்சடையோனே போற்றி                                 (88)

உலகெல்லா மென்றுதிர்த்த உத்தமனே போற்றி
அழகெல்லா மொன்றுசேர்ந்த நர்த்தகனே²¹ போற்றி
விலகின்நின்று விளங்கவைக்கும் வித்தகனே²² போற்றி - அற
மொழுக அருளுரைக்கும் தத்துவனே போற்றி                                                  (92)

அற்புத வுடல்தந்த கொடையானே போற்றி
நுட்பமாய் வுள்ளிருக்கு முடையானே போற்றி
சர்ப்பமதை சூடியநடு நிலையானே போற்றி - ஒளிச்
சிற்பமாய் அருளுமண்ணா மலையானே போற்றி                                            (96)

மகுடமென முடிகொண்ட சடையோனே போற்றி
பகுத்தறிய மதிதந்த மதியோனே போற்றி
புகலிடம் தருமலர் அடியானே போற்றி
அகலாது விழிநிறையும் வடிவோனே போற்றி                                                 (100)

உயிரொடுக்கி யருளுகின்ற உருத்திரனே²³ போற்றி - அவ்
வுயிர்காக்க ஓடிவரும் திருமகனே போற்றி
உயர்வான ஞானம்தந்த குருபரனே போற்றி - உம்
உயர்வான அடிசேர அருள்பவனே போற்றி                                                       (104)

இல்லாமல் இருக்குமழி வில்லானே போற்றி
எல்லாமாய் இருக்கின்ற வல்லானே போற்றி
சொல்லாமல் கொடுத்தருளும் நல்லோனே போற்றி
உள்ளாடு முயிருக்குள் உள்ளானே போற்றி                                                      (108)

மெய்
உணர்வாலே உணருகின்ற உண்மையே போற்றி
உணராது அறியமுடியா தன்மையே போற்றி
இருளுக்கு முன்நின்றத் தொன்மையே போற்றி
இருளகற்றி வொளிதரும் நன்மையே போற்றி                                                  (112)

ஆகமமாய்²⁴ ஆகிநின்ற அம்மானே²⁵ போற்றி
ஏகாந்தமாய் நிற்கும் எம்மானே²⁶ போற்றி - அருட்
தாகம் போக்குகின்ற தம்மானே²⁷ போற்றி
பாகமொரு பாதிதந்த பெம்மானே²⁸ போற்றி                                                  (116)

பாவமதைப் போக்குகின்ற பாவகனே²⁹ போற்றி - பரி
காரமதை யருளுகின்ற ஆகமனே³⁰ போற்றி
சாபமெல்லாம் தீர்க்கின்ற சாதுவனே³¹ போற்றி - சன்
மார்க்கம்தனைப்³² போதிக்கும் போதகனே போற்றி                                    (120)

இருளு மொளியுமாய் இருப்பவனே போற்றி
பிழைகளைத் தாயாய் பொறுப்பவனே போற்றி
வினைப்படி பிறப்பினை யறுப்பவனே போற்றி
வினைப்பயனை மறவாது தரும்சிவனே போற்றி                                           (124)

சுழல்புவிக் காக்கின்ற அழல்வண்ணனே³³ போற்றி
அழல்பசிப்³⁴ போக்குகின்ற அம்மையப்பனே போற்றி - இட
கழல்காட்டி ஆடுகின்ற தில்லைக்கூத்தனே போற்றி - தண்
ணிழல்தந்து³⁵ அரவணைக்கும் எல்லையில்லானே போற்றி                       (128)

சொல்லாமல் உணருகின்ற அத்தனே³⁶ போற்றி - விட்டுச்
செல்லாமல் தொடருகின்ற நிருத்தனே³⁷ போற்றி
நில்லாமல் உதவுகின்ற விருத்தனே³⁸ போற்றி
எல்லாப்புவிக்கு மொன்றான ஒருத்தனே³⁹ போற்றி                                     (132)

ஓம் என்றமந்திரத்தின் உட்பொருளே போற்றி
ஒய்யார நடனமாடும் சிற்சபேசா⁴⁰ போற்றி
யாமுண்டு என்றுணர்த்தும் அருட்கரமே போற்றி
ஐயமகற்றும் மெய்ஞான விற்பனனே⁴¹ போற்றி                                          (136)

சீடனுக்கு காத்திருந்த குருநாதனே போற்றி
வேடன்விழிப் பார்வைக்கொண்ட பெருமானே போற்றி - பிறை
சூடனாக நின்றருளும் பெருந்தகையே போற்றி
ஈடனாக⁴² ஈந்துவக்கும் தியாகேசனே போற்றி                                            (140)

நாவுக்கரசரை மீட்டெடுத்த நாயகா போற்றி - மாணிக்க
வாசகரை ஆட்கொண்ட மாயவா போற்றி - ஞானப்
பாலினை வூட்டியருளிய தாயுமானவா போற்றி - சுந்தரர்
தோழனாய் துணைநின்ற மந்திரமூர்த்தியே போற்றி                                  (144)

மால்அயனும்⁴³ மலைத்துநின்ற பேரொளியே போற்றி
வேலன்வேட்கைத் தீர்த்துவைத்த மாமணியே போற்றி
காலனுக்கு புத்திதந்த கோமகனே போற்றி - திரு
மூலனுக்கும் முக்திதந்த மூலவனே போற்றி                                                  (148)

அறுபத்திமூவரை பாடவைத்த நாயனே⁴⁴ போற்றி
அறுபத்திமூவரை ஆட்கொண்ட நேயனே போற்றி
அருகில்வந்து அருளுகின்ற சேயோனே⁴⁵ போற்றி
அருவுருவம் இரண்டும்கொண்ட மாயோனே போற்றி                                 (152)

காளஹஸ்த்தியில் கண்களைப் பெற்று
வாயுலிங்கமாக நிற்கும் என்னப்பனே போற்றி
காஞ்சிபுரத்தில் மண்ணுரு பெற்று
காமாட்சி கரம்பிடித்த ஏகம்பனே போற்றி,                                                    (154)

திருவண்ணாமலையில் தீபமாய் ஒளிர்ந்து
இருளனைத்தையும் போக்கும் தேசனே போற்றி
திருவானைக்காவலில் தீர்த்தமாய் எழுந்து
அருமருந்தாய் பிணிபோக்கும் நேசனே போற்றி                                          (156)

சிதம்பரம்தனிலே நடமதைப் புரியும்
சிரமதில் பிறையுடை சிவனே போற்றி
நிதமுனைத் தொழுதிட மனமது மகிழ்ந்திடும்
நிரந்தர அருள்தரும் ஈசனே போற்றி                                                              (158)

இனிப்பானக் கனிபோன்ற இனியவனே போற்றி
பிணிநீக்க பணியாற்றும் தனித்துவனே போற்றி - கண்
மணிபோல எமைக்காக்கும் இமையவனே போற்றி - நீறு
அணிந்தாலே துணிவூட்டும் நமசிவாய போற்றி                                          (162)

ஓம் நமசிவாய நமசிவாய நமசிவாய போற்றி - திரு
நாமமுனதை நாளும் சொல்வோம் நமசிவாய போற்றி
ஓம் நமசிவாய நமசிவாய நமசிவாய போற்றி
தேம்பாய்⁴⁶ நாவும் சொல்ல இனிக்குமே நமசிவாய போற்றி                    (166)

சிவனருளால்
சிறு அடியேன்
இராம்ஸ் முத்துக்குமரன்.